ქათმის ბარკლები ბოსტნეულით გემრიელი და ნოყიერი სადილის შესანიშნავი ვარიანტია. მარტივადაც მზადდება. დამზადების დრო: 1 სთ 20 წთ. ულუფა: 4-6.
ინგრედიენტები:
- ქათმის ბარკლები 600-800გრ;
- კომბოსტო 600გრ;
- ხახვი 1თ;
- სტაფილო 1ც;
- ბულგარული წიწაკა 1ც (ფერი სურვილისამებრ);
- ნიორი 1-2კბილი;
- მარილი, პილპილი გემოვნებით;
მომზადების წესი:
ქათმის ბარკლებს მარილი და პილპილი წავუსვათ, სურვილისამებრ, სხვა სანელებლებიც შეიძლება. კომბოსტო წვრილად დავკეპოთ, სტაფილო გავხეხოთ, ხახვი ალყა-ალყა დავჭრათ, ბულგარული – წვრილ ღერებად, ნიორი – წვრილად. დაჭრილი ბოსტნეული შესაწვავ პაკეტში ჩავდოთ და მარილი დავამატოთ, თავი შევუკრათ და ხელით შევანჯღრიოთ , რომ მარილი თანაბრად გადანაწილდეს. პაკეტი შესაწვავ ფორმაში ჩავდოთ, თავი მოვხსნათ, ბოსტნეულზე ბარკლები დავაწყოთ და ძაფით შევუკრათ თავი, ზემოდან რამოდენიმე ადგილას ჩავჩხვლიტოთ ჩანგლით. შევდგათ 190 გრადუსზე გახურებულ ღუმელში 50-60 წთ. კერძის მზაობამდე 7-10 წთ ადრე პაკეტი ფრთხილად გავჭრათ და შევაბრუნოთ ღუმელში, რომ ბარკლები დაიბრაწოს. გემრიელად მიირთვით!
კომენტარის დატოვება